woman-with-melanoma-her-skin (3)
Melanoma

Испакната бенка: дали е опасна?

Written and medically reviewed by Dr. Verche Todorovska, specialist dermatovenereologist

Не. Повеќето испакнати бенки се дермални невуси, обични бенки кои со годините стануваат поиспакнати и не носат поголем ризик од рамните. Луѓето најмногу се плашат токму од нив, бидејќи постојано се закачуваат и повредуваат. Внимание бара само нова испакната промена која е цврста и расте, особено кај возрасен човек.

Накратко

  • Испакнатите бенки најчесто се дермални невуси. Безопасни се, исто како рамните.
  • Многу бенки со текот на животот стануваат поиспакнати. Тоа е нормално.
  • Знак за тревога е нова испакната промена која е цврста и расте: правило „издигнат, цврст, расте“.
  • Секоја бенка смее да се отстрани, и кога пречи естетски или постојано се закачува.
  • Отстранувањето не предизвикува рак.

Зошто некои бенки се испакнати?

Бенките се бенигни израстоци на кожата, групи на пигментни клетки (меланоцити). Повеќето кај децата се мали, мазни и рамни. Со текот на годините, некои стануваат поиспакнати и посветли, а некои се такви од почеток. Тоа се таканаречените дермални невуси. Тие се нормален дел од кожата.

Митот дека „испакнатата бенка е опасна“ доаѓа од тоа што таквите бенки постојано се закачуваат: при бричење, чешлање, облекување. Но повредата не ја прави бенката малигна. Повеќе за митовите во Дали се опасни бенките?

Кога испакнатата промена е знак за тревога?

Кога е нова и расте. За ваквите промени важи правилото:

  • издигната над кожата,
  • цврста на допир,
  • расте.

Ова правило е важно затоа што најагресивниот вид меланом, нодуларниот, е токму испакнат, симетричен и со една боја, понекогаш и розов, без пигмент. Не ги исполнува АБЦДЕ знаците, а расте околу половина милиметар месечно.

Кај возрасен човек, особено над 45–50 години, не очекуваме нова бенка да се појави и да почне да расте. Таквата промена треба да се прегледа и најчесто да се отстрани.

Испакнатата промена не мора да е бенка

Многу испакнати „бенки“ кај повозрасните всушност не се бенки:

  • себороична кератоза, „масна брадавица“: кафеава, ронлива, како залепена на кожата. Безопасна е. Повеќе во Што е себороична кератоза?
  • нодуларен базоцелуларен карцином: на лицето најчесто изгледа како мало јазолче, слично на бубуличка или бенка, малку проѕирно, розеникаво или пигментирано
  • папилом: мек, висечки кожен израсток, најчесто на вратот и под пазувите

Само со дермоскоп може со сигурност да се каже што е што.

Што ако бенката се закачува и пречи?

Може да се отстрани. Секоја бенка може да се отстрани, затоа што дерматологот го препорачал, или затоа што пречи и е естетски неприфатлива. Отстранувањето е секогаш во целост и нема никаков ризик. Ако некоја промена ве плаши при секое миење на косата или бричење, нема причина тоа да трае со години.

Важно е само бенката, пред да се отстрани, да се прегледа со дермоскоп, и отстранувањето да биде хируршко, со патохистолошка анализа. Никогаш не отстранувајте бенка сами или со домашни средства. Повеќе во Кога е потребно да се отстранат бенките?

Испакната бенка кај дете

Кај децата бенките растат заедно со детето, полека и симетрично, и тоа е нормално. Единствено бенка која нагло расте, во рок од два-три месеци станува испакната и розеникава или многу темна, сино-црна, треба да се прегледа без одложување. Најчесто станува збор за Спиц невус, бенигна бенка која се препорачува да се отстрани, бидејќи понекогаш не може со сигурност да се разликува од меланом.


Закажете дермоскопски преглед во Дерма Нова. Ќе знаете дали вашата испакната бенка е обичен невус или промена што треба да се отстрани.

Најчесто поставувани прашања

Дали испакнатите бенки се поопасни од рамните?

Не. Најчесто се дермални невуси и имаат ист ризик како рамните бенки.

Бенката ми стана поиспакната со годините. Дали е тоа нормално?

Да, многу бенки со годините стануваат поиспакнати и посветли. Внимание бара бенка која брзо расте, станува цврста или се менува во боја.

Може ли да се отстрани испакната бенка што постојано се закачува?

Да. Секоја бенка може да се отстрани, и од естетски причини. Пред тоа треба да се прегледа со дермоскоп, а отстранувањето да биде хируршко, со анализа.

Кога испакната бенка е опасна?

Кога е нова, цврста и расте, особено кај возрасен човек. Таквата промена треба веднаш да се прегледа, бидејќи може да биде нодуларен меланом.